無矽洗髮水新品上架，廣告賣通街，因為洗頭水幾乎每天都要用到，而可以令自己用完感覺滿意的產品少之又少，用完一隻，覺得頭髮不柔順，就會想試新貨。
位於牛池灣的上海理髮店，幫人剪髮洗髮幾十年的理髮師林生就不以為然：「一直以來冇咩特別護髮方法，都係用洗頭水幫客洗頭，之後再用護髮素令頭髮滑少少。頭髮好乾好穅有時都係天生，通常頭髮順滑嘅人都唔吹頭，不過而家啲後生仔女都好難唔吹。洗頭水愈出愈多，都係噱頭啫，你知女人錢最易呃啦。」
原來所謂新出的無矽洗髮水，市面上一直都有，不過選擇不多，才沒有被廣泛認識。矽經常會加入洗髮水、護髮素及化妝品等。有說用矽會堵塞頭部皮膚毛孔，記者從個人護理用品店中所見，兩大排貨架放滿洗髮護髮產品，十居八九都有矽，長期使用不就很易出問題？

皮膚科專科陳珮瑤醫生就笑言：「如果有問題，矽一早就被禁止使用啦，矽好少會致敏，亦都冇咩個案係矽塞住頭皮毛孔嚟求診。」反而因為洗髮水所加入的香料及防腐劑，引致出現敏感情況比較常見，「洗頭水並唔係話冇矽就代表佢優勝啲。」
她解釋洗髮產品要加入矽的原因：「頭髮表面會有啲硬化嘅蛋白質，蛋白質就形成毛鱗片，洗頭嘅時候，矽就會填補呢啲鱗片同鱗片之間嘅空隙，睇上去、摸落去都會比較順滑，亦比較有光澤同健康。」
不過，陳亦提醒：「如果用洗頭水洗頭嘅時候沖洗得唔乾淨，太多物質殘留喺頭皮，都有機會堵塞毛孔，引致有毛囊炎情況。有時用太多含非水溶性矽的洗髮護髮產品，因為難以完全沖走，有可能積聚在頭髮表面，令頭髮變得厚重或者乾燥，這時候可以考慮轉一轉洗頭水。」

點知矽唔矽？

舊式理髮店是先坐在椅子上用水及洗頭水洗頭，之後才去沖水。師傅林生笑記者的頭髮乾，說很難有什麼方法變得順滑，記者轉用過不少洗髮護髮產品，有矽無矽都試過，幫助都不大。

洗髮護髮產品五花八門，成分通常以英文標示，字體微細，一般看完都不甚了了，陳珮瑤醫生教路如何分辨有矽無矽：「你睇洗頭水成分列表嘅時候，如果嗰種化學物質最後幾個英文字係 cone或者 one就係矽。」字根來自矽英文 silicone。例如小圖中的「 Dimethicone」，但不用擔心，矽不會造成堵塞毛孔問題，不過如果要追求無矽，現在亦有相關產品可供選擇。